ڊاڪٽر بدر الدين اڄڻ

بدر الدين اُڄڻ، ڊاڪٽر: ڊاڪٽر بدر الدين اُڄڻ پهرين اپريل 1947ع تي پير بخش اڄڻ جي گهر، شڪارپور ۾ جنم ورتو. بدرالدين اڄڻ پرائمري ۽ ثانوي تعليم شڪارپور ۾ ورتي. 1962ع ۾ مئٽرڪ، 1967ع ۾ بي ايس سي ۽ 1969ع ۾ انگريزي ادب ۾ ايم. اي ڪيائين. 1973ع ۾ ايل. ايل بي ۽ 1977ع ۾ ”بين الاقوامي تعلقات “۾ ايم اي جون ڊگريون حاصل ڪيون. 1973ع ۾ اسلاميه ڪاليج ڪراچيءَ ۾ انگريزيءَ جو ليڪچرر مقرر ٿيو. 1977ع ۾ شاهه عبداللطيف يونيورسٽيءَ خيرپور مان ڊاڪٽر تنوير عباسي جي نگرانيءَ ۾ ”سنڌي ۽ انگريزي ادب جي تنقيدنگاري جو تقابلي جائزو“ جي موضوع تي سنڌيءَ ۾ پي. ايڇ ڊي ڪيائين. 1981ع ۾ سي ايس ايس ڪرڻ کان پوءِ سنڌ ۽ بلوچستان جي اهم انتظامي عهدن تي فائز رهيو. آخر ۾ تعليم کاتي ۾ ايڊيشنل سيڪريٽري جي عهدي تان 2007ع ۾ رٽائر ٿيو. هو مختلف تنظيمن جو عهديدار رهيو آهي، جن ۾: ليڪچرر ايسوسيئيشن، سگا، مهراڻ ليڪچررس ۽ ٻيون تنظيمون شامل آهن. هن وقت انجمن ترقي پسند مصنفين جو جنرل سيڪريٽري آهي. رٽائرمينٽ کانپوءِ هو شاهه عبداللطيف يونيورسٽي خيرپور ۽ ڪراچيءَ جي هڪ خانگي يونيورسٽي BIZTEK ۾ رجسٽرار رهيو. لياري يونيورسٽيءَ جي انگريزي شعبي ۾ وزيٽنگ پروفيسر جي حيثيت ۾ خدمتون سرانجام ڏنائين. هن وقت شڪارپور ۾ شيخ اياز يونيورسٽي ۾ ڊائريڪٽر HRM ۽ انگريزي شعبي ۾ وزيٽنگ پروفيسر طور ڪم ڪري رهيو آهي. سندس ڪيترائي مقالا پڻ شايع ٿيل آهن. سندس ڇپيل ڪتابن ۾”ٽي ايس ايليٽ“، ”زان پال سارتر“، ”روسي ادب“، فيض-گهڻ پاسائين شخصيت“، ”ايلس ٽو فيض“، ”سنڌي ادب جو تنقيدي جائزو“، ”مڌوبالا“، ”وجوديت واد ۽ انسان دوستي“ شامل آهن.

داخلا ۾ استعمال ٿيل تاريخون

1947.04.01  عيسوي

بدرالدين اُڄڻ ، ڊاڪٽر: بدرالدين اُڄڻ پهرين اپريل 1947ع تي پير بخش اڄڻ جي گهر ، شڪارپور ۾ جنم ورتو . سندس خاندان سنڌ جي فقيراڻي قبيلي سان لاڳاپو رکي ٿو ، جنهن وڏي عرصي کان وٺي سنڌ جي روحاني خدمت ڪئي آهي

شخصيتون - ڀاڱي جون ٻِيون داخلائون